Ezr 8 | NdeIBE | STEP | Laba yibo izinhloko zezimuli lalabo ababhalisa kubo abeza lami sisuka eBhabhiloni ngesikhathi sokubusa kweNkosi u-Athakisekisi:

Ezra 8

Uluhlu Lwabanumzana Ababuya lo-Ezra

1 Laba yibo izinhloko zezimuli lalabo ababhalisa kubo abeza lami sisuka eBhabhiloni ngesikhathi sokubusa kweNkosi u-Athakisekisi:

2 abesizukulwane sikaFinehasi, uGeshomu; abesizukulwane sika-Ithamari, uDanyeli; abesizukulwane sikaDavida, uHathushi

3 owesizukulwane sikaShekhaniya; abesizukulwane sikaPharoshi, uZekhariya, okwabhalisa kanye laye amadoda ali 150;

4 abesizukulwane sikaPhahathi – Mowabi, u-Eliyehoyenayi indodana kaZerahiya oweza lamadoda angama 200;

5 abesizukulwane sikaZathu, uShekhaniya indodana kaJahaziyeli, oweza lamadoda angama 300;

6 abesizukulwane sika-Adini, u-Ebhedi indodana kaJonathani, oweza lamadoda angama 50;

7 abesizukulwane sika-Elami, uJeshaya indodana ka-Athaliya, oweza lamadoda angama 70;

8 abesizukulwane sikaShefathiya, uZebhadiya indodana kaMikhayeli, oweza lamadoda angama 80;

9 abesizukulwane sikaJowabi, u-Obhadiya indodana kaJehiyeli, oweza lamadoda angama 218;

10 abesizukulwane sikaBhani, uShelemothi indodana kaJosifiya, oweza lamadoda ali 160;

11 abesizukulwane sikaBhebhayi, uZekhariya indodana kaBhebhayi, oweza lamadoda angama 28;

12 abesizukulwane sika-Azigadi, uJohanani indodana kaHakathani, oweza lamadoda ali 110;

13 abesizukulwane sika-Adonikhani, abokucina, amabizo abo ayengo-Elifelethi, uJeweli loShemaya, beza lamadoda angama 60;

14 abesizukulwane sikaBhigivayi, u-Uthayi loZakhuri, abeza lamadoda angama 70.

Ukubuyela eJerusalema

15 Ngababuthanisa eMgelweni wamanzi agelezela ku-Ahava, samisa khona okwezinsuku ezintathu. Ngathi sengihlola phakathi kwabantu labaphristi, kangifumananga mLevi khona.

16 Yikho ngasengibiza u-Elinathani, loNathani, loZekhariya loMeshulami ababengabakhokheli, loJoyaribi lo-Elinathani ababengabantu abafundileyo, 17 ngabathumela ku-Ido, lezihlobo zakhe, izinceku zethempelini eKhasifiya, ukwenzela ukuthi basilethele izikhonzi ezendlu kaNkulunkulu.

18 Ngokuba isandla somusa sikaNkulunkulu sasiphezu kwethu, basilethela uSherebiya, indoda emadodeni, owesizukulwane sikaMahili indodana kaLevi, indodana ka-Israyeli, lamadodana kaSherebiya labafowabo, amadoda ali 18; 19 loHashabiya, kanye loJeshiya owesizukulwane sikaMerari, kanye labafowabo labantwababo, amadoda angama 20. 20 Bona beza lezinceku zethempelini ezingama 220 – inani elalimiswe nguDavida lezinduna zakhe ukuncedisa abaLevi. Bonke babhalwa phansi amabizo abo.

21 Khonapho, ekhunjini loMgelo we-Ahava, ngamemezela ukuzila ukudla, ukuze sizehlise phambi kukaNkulunkulu wethu simcele asiphe uhambo oluhle, thina labantwabethu, lezimpahla zethu zonke. 22 Ngaba lenhloni ukucela kuJehova amabutho labakhweli bamabhiza ukuthi basivikele ezitheni endleleni ngoba inkosi sasiyitshele sathi, “Isandla somusa sikaNkulunkulu wethu siphezu kwakhe lowo okhangele kuye, kodwa ulaka lwakhe olukhulu luyavutha kulabo abamfulathelayo.”

23 Ngakho sazila ukudla, samncenga uNkulunkulu wethu ngakho lokhu, wawuphendula umkhuleko wethu.

24 Ngasengisehlukanisa kwabanye abaphristi abalitshumi lambili abangabakhokheli, ndawonye loSherekhiya, loHashakhiya labalitshumi labafowabo, 25 ngabalinganisela umnikelo wesiliva legolide lezimpahla ezaziyisipho esasisuka enkosini, labacebisi bayo, lezikhulu zayo laba-Israyeli bonke ababekhona lapho, siyisipho sendlu kaNkulunkulu. 26 Ngabalinganisela amathalenta angama 650 awesiliva, izimpahla zesiliva ezilobunzima obungamathalenta ali 100, amathalenta ali 100 awegolide, 27 imiganu yegolide engama 20 kuthiwa intengo yayo ingaba ngamadariki ayi 1,000, lezitsha ezimbili ezethusi elilolongiweyo eliligugu njengegolide.

28 Ngathi kubo, “Lina kanye lezimpahla lezi lingcwelisiwe eNkosini. Isiliva legolide kungumnikelo wokuzizwela kuJehova, uNkulunkulu wabokhokho benu. 29 Kulindeni ngonanzelelo lize liyokulinganisa emakamelweni endlu kaJehova eJerusalema phambi kwabakhokheli babaphristi labaLevi labayizinhloko zezimuli zako-Israyeli.”

30 Kwathi-ke abaphristi labaLevi basemukela isiliva legolide lezimpahla ezingcwele ezazilinganisiwe ukuze zisiwe endlini kaNkulunkulu wethu eJerusalema.

31 Ngosuku lwetshumi lambili lwenyanga yokuqala saphakama sasuka eMgelweni we-Ahava saqonda eJerusalema. Isandla sikaNkulunkulu wethu sasiphezu kwethu, wasivikela ezitheni lazigebengwini indlela yonke. 32 Ngakho safika eJerusalema, saphumula khona okwezinsuku ezintathu.

33 Ngosuku lwesine sangena endlini kaJehova salinganisa isiliva legolide lezimpahla zonke ezingcwelisiweyo sazibeka ezandleni zikaMeremothi indodana ka-Uriya umphristi. UEliyazari indodana kaFinehasi laye wayekhona, labaLevi oJozabhadi indodana kaJoshuwa loNowadiya indodana kaBhimuyi. 34 Konke kwakukhona ngenani lakho langesisindo, kwathi isisindo sonke salotshwa phansi ngasonaleso isikhathi.

35 Yikho izithunywa ezabuya ebugqilini zenza umhlatshelo wokutshiswa kuNkulunkulu ka-Israyeli: izinkunzi ezilitshumi lambili ezika-Israyeli wonke, izinqama ezingamatshumi aficagalolunye lesithupha, amawundlu amaduna angamatshumi ayisikhombisa lesikhombisa kanye lomnikelo wesono oyizimpongo ezilitshumi lambili. Konke lokhu kwakungumnikelo wokutshiswa kuJehova.

36 Bathi njalo bethula imilayo yenkosi kuzikhulu zenkosi lakubabusi bangaphetsheya kweYufrathe, okwathi-ke bona bancedisa abantu kanye lasendlini kaNkulunkulu.